Qarku Tirane

Kryeqyteti me 100 mijë pemë të reja, aksioni vijon deri në Ditën e Tokës

Published at : 26/03/2018 - 19:44

Tiranës i janë shtuar 100 mijë pemë të reja të cilat falë angazhimit të shumë qytetarëve, institucioneve, qindra bizneseve e donatorëve që iu bashkuan aksionit të Bashkisë së kryeqytetit.

Aksioni ishte parashikuar të mbyllej më 22 mars, por nisur nga kërkesa e madhe e qytetarëve dhe subjektet e tjera private që janë regjistruar në radhën për të mbjellë pemë, ky aksion do të shtyhet deri në një datë tjetër të rëndësishme, 22 prill, Ditën e Tokës.

I pranishëm në mbjelljen e pemëve të reja në liqenin e Farkës, kryebashkiaku Erion Veliaj deklaroi se për shkak të interesit të lartë dhe numrit të qytetarëve dhe të kompanive që janë regjistruar në listë pritje për të dhuruar pemë, aksioni për mbjelljen do të vijojë dhe për një muaj tjetër.

Tirana është bashkia më e madhe e Qarkut dhe një shembull për të gjitha bashkitë e tjera, ndërsa ky aksion qytetar tregoi se gjithçka mund të arrihet përmes energjisë pozitive dhe me vepra konkrete.